Shillong, September 16: Khasi Hills Autonomous District Council, Ri Bhoi District-o Joa kal·chakram Casino-na nok rikna on·jana. miksonge KHADC-ni MDC-rang September 16 tariko tom·e chanchirime Ri Bhoi District-o Casino-ko abachengna on·jana tik ka·angaha ine KHADC-ni CEM Pa TW Chyne aganaha.

Meghalaya a·doko songdonggipa manderangko Isolna kengipa aro sontolgiparang inesa pilakchin ui·toka. A·dokni ong·telaigipa buring bolgrim aro A·brini a·kongni nitoan baksa manderangni nama cholon bewal namanikosa gipin biaponi re·bagiparang agan golpotoka. Unigimin chinga Meghalaya a·dokona gipinoni re·bagiparangko indongao an·senganganikosa nangnika, joa kal·na, pekgipa ringa cha·aniko jakkalna re·baaniko nangnikja ine Pa Titosstar agandapaha.

Re·anggipa September 1 tarikon Raid Marwet-ni Syiem-na Council-oni Casino-na nok rikchakna on·jachina chitti seatahachim indiba uko man·sokujaa ine ui·na man·aha, maina songbad-o janapani gita Raid Marwet-ni Syiem Casino-na nok rikchakanio maming neng·nikani ba jegalani dongjawa ine janapachim. Unigimin jean Casino-na nok rikchakna NOC-ko on·achim uan Syiem ba ong·jaode ua biapni Headmen ong·na nanga ine Council ma·sina man·aha. Indake ong·engon, iara maini a·sel aro mai miksonganio Casino-na a·ako on·na miksongenga uakoba Syiem-oni rongtale talate on·aniko nanggen ine Pa Titosstar agandapaha.