Tura, June 12: North Garo Hills a·jani Resubelpara sub urban-ni ning·o donggipa Khaldang Rongsrek-o rama tariatenggipako indita jaarangna kingking matchotatgija galchipenggipani bidingo A·chik Holistic Awakening Movement (AHAM), Sombar salo a·jani Deputy Commissioner-na badia ka·doangaha.

Ua matchotatgija galchipenggipa ramani obostarangko a·jani DC-na organisation-ni badi ka·dongani gita, Khaldang Babupara-oni Khaldang Songma-ona tarienggipa ramako batanggimin 2021 bilsion a·bachengatahaoba da·alona kingking matchotatgija indita jaarangna galchipengani a·sel song damgnini manderang da·o gita wachi-karini somoiode namjabatgipa obostako chagrongna gita nangronga maina, songni manderang garirangko jakkalna man·jae sagipa-ding·gipa manderangba an·tangtangko sanna gita ja·achisa re·drabana gita nangpilenga ine janapataha.

Indake ong·engon, ua galchipenggipa ramako man·adipet gong·raken tariatchina aro nirokatchina gita AHAM, uamangni chittio bil man·giparangko mol·molataha.