Shillong, Dec 19: Sonibar salo, Khasi aro Jaintia Hills a·jani manderang, poedo serakgipa aro sea jotani a·bakkuo mingsing minggamako man·gipa U ‘Myllung’ Soso Tham-ni chang 81-gipa siani salko gisik ra·e maniangtokaha.

Khasi aro Jaintia Hills a·jarango dingtang dingtang dolrang, ia peodo serakgipa mandeni siani salko gisik ra·na gita uni bimangko tarie dongipa biapona re·ange uni bimango pul aro malarangko pate donbatokaha.

Ia salko Khasi Students Union (KSU) aro Federation of Khasi Jaintia & Garo People (FKJGP) dolrangba gisik ra·na gita dingtangmancha program-ko U Soso Tham Auditorium-o aro NEHU Shillong Campus-oba ong·atangaha.

U ‘Myllung’ Soso Tham-ni chang 81-gipa siani salko gisik ra·na gita Khasi Authors’ Society aro Meghalaya sorkarini Arts & Culture department-ba nangrime dingtangmancha program-ko Shillong songjinmani St Anthony’s College-o ong·atangaha aro ia program-ko ong·atanio Meghalaya Legislative Assembly-ni Speaker Metbah Lyngdoh, skotong sokgipa ong·e bakko ra·angaha.

2020-21 bilsirango State board aro Central Board-ni dingtang dingtang porikkarango Khasi aro MIL subject-o bang·bate mark man·gipa chatro chatrirangna dingtangmancha ia program-ko ong·atanio boksisrangko on·angaha.