Shillong, Mar 13: Khasi aro Jaintia-rangni songsalo, gam-jinrangko dedrangna on•rikanio maming mikkang niteani dongjana gita aro pilaknan apsan ong•na man•na gita 1986 bilsini May jao gitcham Governor-ni ra•bagipa Meghalaya Succession to Self-acquired Property, Khasi and Jaintia Special Provision Act 1986-ko taridapna gita Maitshaphrang dolni chairman Michael Syiem didiangaha.
Syiem-ni parakatani gitade, Khasi aro Jaintia-rangni songsalo dedrangna gam-jinrangko on•rikani apsan ong•jaengani a•selan gipin biaprangoni manderangsa re•bae man•e cha•tokskaenga aro joltangni manderangde kamrangko ka•e cha•na cholrang ong•jaengachim.
Meghalaya a•doko bading chiwale cha•ani aro kamrangko ka•e cha•ani cholrang bang•en dongani giminsa gipin biaprangoni manderang a•dokona re•bae man•e cha•na chol ong•tokenga ine janapatengon, iani giminsa Maitshaphrang dol, me•sarangnaba gam-jinrangko on•rikanio apsan bak rengsiko on•china gita ku•rangko on•enga ine Syiem parakataha.
Ia niamko dingtangatengon, nokdango chonbatgipa demechiknasan gam-jinrangko on•rikaigija ma•a paarang, an•tangtangni namnikani gita dedrangna gam-jinrangko on•rikani giminsa uamang ku•rangko on•enga ineba Syiem parakataha.
Ia niamko taridapanichi me•asa aro me•chikrangni gisepo nokdangni gam-jinrangko apsan sualgrike ra•na man•gen ineba Maitshaphrang dolni chairman aganaha.
