Shillong, July 14: Meghalaya-ni East Jaintia Hills district-ni ning·o donggipa Khliehriat police reserve gittimo Improvised Explosive Device (IED) bom rongsa Butbar pringwal 1:30 bajimango gopretaha ine koborko man·soaha.
IED-chi chadrapako man·gipa quarter-rango mande saksa dongchakengachim ine East Jaintia Hills district-ni Superintendent of Police Pa Jagpal Singh koborna u·iatan baksa, rasong gnange ia ong·a obostao darang saksaba saknaa ba sianga-bon·angade dongjaha ineba SP taldapataha.
“Police Headquarters Shillong-oniko Bomb Disposal Squad, Crime Scene Unit aro gipin nangchongmotgipa dakchakanirangko on·echina gita u·iataha,” ine Pa Singh aganatkuaha.
Da·odipet, ia chadrapaniko dakani a·selrangko ma·sina man·kujaenga aro iako darang organisation-oniba a·kangata dongkuja ine koborko man·soaha.
Indake ong·engon, a·dokni Home Minister Pa Lahkmen Rymbui-ba ia obosta ong·manchaaniko aganataha aro sandirokatanirangko dakatenga ineba koborna talataha.
