Shillong, May 4: Meghalaya a•doko ra•gate ka•enggipa PMGSY ramarangko Mongolbar salo, Meghalaya a•dokni Chief Minister Conrad K Sangma nipilangenba, ministry-ni ra•chakgimin kilometre 1800-mangko a•doko matchotatna gita a•ja ge•antinan nisanko donangaha.
Kamrangko somoi gita matchotatna district aro block level-o nirokjringchina gitaba ua dingtang dingtang a•jani deputy commissioner-rangko aro officer-rangko ge•etangaha.
Re•anggipa bilsioba Meghalaya a•doko km 728.25 ramarangko matchote dongimin nisanni 98 percent-mangkode matchotna man•ahachim.
Sajinmani a•sel a•doko neng•nikanirangko chagrongna nangahaoba kamrang chu•ongnikaniko man•aha ine janapatengon, mikkangchiba nisantangtangko chu•sokatna man•na gita kamrangko ka•angkuchina gita a•dokni Chief Minister, officer-rangko aro chief engineer-chi dilenggipa dolko didiangaha.
2013 bilsioni matchotgija dongenggipa kamrangko matchotatna gita gisik on•bate kam ka•chinaba ua ge•etangaha.
