Shillong, June 1: Re·anggipa May 30 tariko East Jaintia Hills a·jani Sutnga Elaka-o mande sakbonga koela a·damo gimana nangahani gimin ia a·selni bidingo name ma·sina gita magisterial inquiry-ko dakchina a·dok sorkari ge·etangaha.
Ia a·sel ong·an baksana a·doko niam gri koela bikotanirang batroroengani giminba a·dok sorkari suk ong·gijaniko parakataha.
Ia koela a·damo mande sakbonga gimaahani gimin an·tangni suk ong·gijaniko parakatengon, a·doko niam gri koela bikotaniara namen kragijani ong·a aro iandakgipa kamko sorkari maming dakeba ra·chakna man·jawa ine Meghalaya a·dokni Home Minister Lahkmen Rymbui parakataha.
Ia a·selni bidingo police-rang ning·tue sandie a·sel ong·anio jak donggipa manderangni kosako nanga gita ja·kurangko de·gen ine Home Minister parakataha.
Rymbui-ni parakatani gitade, ia koela a·damara mongsonggipa ramaoni km 3-4 chel·aosa ong·ani gimin iandakgipa a·selrangko am·sandianio police-rang neng·nikanirangko man·ronga.
Ia jolrangko nambate nirok sandina man·na gita Police department, Sutnga Elaka-o donggipa Umpleng AD camp-ko outpost songskana sorkario bi·ataha ineba Home Minister parakataha.
Koela a·damo gimaenggiparangko sandina jotton ka·enggipa dolrangni bidingo janapatengon, ia biapo SDRF, Fire brigade aro police-rang donge kamko ka·enga indiba da·o dipet chirang tipkujaengani gimin uamang senge dongana agrede mamingkon dakna man·kujaenga ine Rymbui parakataha.
Ia koila a·damo gimagipa mande sakbongaoni sakgittamde Assam Boko-oni Abdul Karim, Assam Barpeta-oni Abdul Kalam aro Tripura a·dokoni Shyamcharan Debbarma ong·achim. Koila a·damo gimagipa mande sakgniba Assam-oni ong·achim indiba da·o dipet uamangni bimingrangko ma·sina man·kujaengachim.
