Shillong, June 25: East Jaintia Hills a·jani Sutnga koela a·kolo gimaenggipa manderangko antibrimangna sandiani ja·man da·o gittamgipa mandeni manggisikoba Sukrobar salo, Indian Navy-ni chi ripe sandigipa sipairang, ra·ongkatna man·aha.
Ia koela a·kolo gimaenggipa manderangoni da·o sakgittamni manggisikode koela a·koloniko ra·ongkatna man·aha aro gipinrangkoba sandina gita sipairang rakbee kamrangko ka·engkua.
East Jaintia Hills a·jani Deputy Commissioner E Kharmalki-ni u·iatani gitade, ia gittamgipa mandeni manggisiko ra·ongkatna gita NDRF, SDRF aro gipin dolrangba Navy-ni sipairangna dakchake on·aha aro ia manggisiko ra·ongkatani ja·mano post mortem ka·na gita Khliehriat hospital-ona watataha.
Ia manggisiko man·ani bidingo Assam aro Tripura a·dokni official-rangnaba kobor on·ataha ineba East Jaintia Hills a·jani DC parakataha.
Ia koela a·kolo gimaenggipa manderangni skanggipa manggisiko re·anggipa June 16 tariko man·chengahachim aro uni ja·man gnigipa manggisikoba Bristibar salo, Indian Navy-ni sipairang man·ahachim.
Indake ong·genchimoba, da·o dipet ia manggisirangko darangba ra·ekujaenga ine DC u·iataha.
