Shillong, June 23: East Jaintia Hills a•jani Krem Ule koela a•kolo chirang gapengkuani a•sel da•o dipet ia koela a•kolo gimagipa manderangoni saksani manggisikosan man•kuengpiti ine Budbar salo Meghalaya a•dokni Home Minister Lahkmen Rymbui parakataha.
Ia koela a•koloniko ra•ongkatna man•gipa mandeni manggisiko da•onan darangba ra•ekujaenga ineba Home Minister parakataha.
Rymbui-ni parakatani gitade, ia biapo Indian Navy, NDRF, SDRF aro gipin dolrangba, gimaenggipa manderangko sandina kamko ka•engkua aro koela a•kolo chirang tipangkalahaosa ia sipairang, gimagipa manderangko sandina koela a•kol ning•chi napangtaina man•gen.
Indake ong•genchimoba, koela a•kolo gimagipa manderangko sandina jotton ka•angkugen ine Home Minister parakataha.
Re•anggipa May jani 30 tariko Sutnga Elaka-ni koela a•kolo dynamite boma gopretani ja•man rang•san ia koela a•kolo chi napenba ia koela a•kolo koela bikotenggipa sakbonga manderang gimaahachim aro gimagipa manderangoni saksani manggisikode re•anggipa antio ra•ongkatna man•ahachim.
