Shillong, April 27: Mongolbar salo, Meghalaya a•dokni Health Minister AL Hek, a•dokni Inspector General of Prisons M Kharkrang-ko grongenba, pattoko donako man•enggipa koidirangna COVID-ni tikarangko su•ani bidingo agangrikangaha.
Health Minister baksa agangrikanio Kharkrang-ni parakatani gitade, da•o dipet pattoko donako man•enggipa koidirang COVID-19-ko man•giparang dongkuja aro koidirangna nanga gita chel•chakanirangko on•enga. Koidirangko doctor-rang nirokenga aro COVID-na porikkarangko ra•e nienga ineba Kharkrang u•iataha.
Indake ong•engon, pattoko donako man•enggipa koidirang, kenchakna nangbatgipa biaposa dongna nangengani gimin ua IG (Prisons)-ko grongani ja•man koidirangko tika su•na nangama nangjawa uko niangtaigen ine a•dokni Health Minister AL Hek parakatskaaha.
Koidirang tikarangko su•e ra•na nanggenma ine sing•on, koidirang tikarangko su•na nangtelgende ong•jawa indiba tikako su•na sikgiparangde su•na man•aigen ine Kharkrang parakataha.
Re•anggipa bilsioba, pattoko donako man•enggipa koidirangoni baditaba sak koidirang COVID-19-ko man•ani ja•man, pattoko koidirangni apchangketaniko olgrokatna gita mitam koidirangkode aganku•pattie ba jamino wattokahachim.
