Guwahati, Aug 22: Robibar salpaksachibara, Assam a·dokni Bodoland Territorial Region-ni ning·o donggipa Kokrajhar a·jao dolsa manderangni dakait dakna jotton ka·aniko police-rang champengna man·aha aro dakait dakgipa manderangoni sakgittamko goe galna man·aha.
Ia manderang, Bhotgaon songo donggipa Allahabad Bank branch-ko dakait dakna jotton ka·ahachim indiba bakan police-rang ua biapona sokbae, dakait dakgipa manderang baksa ia bank-oni metre 800-mang chel·ao adita gogrikaha.
Kokrajhar a·jani SP Prateek Thube-ni u·iatani gitade, dakait dakgipa dolo sak 5 ba sak 6-mang dongachim aro uamangan skanggipa police-rangko gochengahachim.
“Dakait dakgipa manderang police-rangko gochengahachim indiba ja·mano police-rangba uamangko gochakskaon, uamangoni sakgittam guli nangako man·e ja·mano siangaha. Gipinrangde ua biaponi kate jokskana man·aha,” ine Thube aganaha.
Ia manderang, bank-ko dakait dakna gita nanggipa bosturangko ra·e re·baahachim maina police-rang, sianggipa manderangoniko de·rurana man·gipa gas cylinder aro bank-ni tangka donchakgipa biapko ratna gita gas-chi ratani bosturangkoba man·ahachim.
So·ota man·gipa manderangko da·o dipet police-rang ma·sikujaenga ine u·iataha.
SP-ni u·iatani gitade, jagittamna skangba apsan daken bank-ko dakait dakna jotton ka·ahachim indiba ua somoioba bank-ko dakait dakna jotton ka·ani chu·sokjahachim.
“Batanggimin changrangoba apsan daken bank-ko dakait dakna jotton ka·ahani gimin chinga bank-ni sambaon police-rangko donahachim aro kobor on·timgiparangkoba chu·onga gitan donahachim,” ine Thube aganaha.
