Guwahati, Nov 7: Sel·tagijagipa noksako de·e uko electronic-ni bimango watdoateming jinmana parakatani gimin actor aro model Milind Soman-ko Goa Police rim·aha ine koborko man·soaha.
Ia mamlao, bilsi 55-ong·gipa actor aro fitness promoter-ni kosako IPC-ni Sec 294 (Obscene acts and songs)ni ning·o aro IT Act-ni Sec 67 (electronic-ni bimango man-solman donggijagipa sel·tagija bostuko gipatani/ parakatanina sasti on·ani)o pangchake police mamlako segatangaha.
Ua actor-ni mija Butbar salo noksa watdoate mesokatgipao, Goa-ni sagal rikamo gangri-chingri dake kataniko nikna man·aha. Je noksakon Assam-oni mande aro uni jikgipa Ankita Konwar de·ahachim uni ka·mao indine seatjolaha, “Angna atchinamsal aro bilsi 55 gapjok da·o gapna mikkang!”. Actor, ua noksako uni atchiani salo mesokatahachim.
Indake ong·engon, actor Milind Soman-ni kosako Colva police station-o mamlako segataha ine salgipeng Goa-ni SP Pankaj Singh-ni agangipa kattarangko koboro parakataha. Dolsa political organisation, jekon Goa Suraksha Manch ine minga uamangni badi ka·anganio pangchake mamlako segataha ineba police officer koborna u·iataha.
Unomiting, actor Poonam Pandey-ni kosako mokordoma segatani ja·man uni kosako Goa Police ja·ku de·ataha. Poonam aro uni segipa jawilwat tarigipa Sam Bombay-maang sakgniko salgipeng Goa-ni Canacona town-o sel·tagijagipa video-ko shooting ka·ani gimin mija Bristibar salo Goa Police rim·aha. Indake ong·oba, jiksesan apsan salon jamin man·tokaha.
