Shillong, Oct 23: Ma·mong sorkarini, Inner Line Permit (ILP)ko Meghalaya a·doko ra·gatna gita somoiko ru·utatengani gimin aroba niam gri a·palchini napbaenggiparangko champengsona gita Khasi Students Union (KSU) mija Sonibar salo East Jaintia Hills a·jani Sonapur ramao an·tangtangan ILP -ko songe niam gri napbaenggipa Bangladesh-ni manderangko champengsoaniko dakangtokaha.

KSU-ni unsalo lekkarangko nirikkimitingo, Assam-ni gari AS-11-U 7010 Hyundai bolsaoniko pekatgipa sam Marijuana (ganja) kg 28 mangko sale ra·baako rim·dike rim·e rakkirikna man·skaaha. Gario sakgittam manderang gnangchim, jeoni sakgni kate jokangaha, indiba gari salgipako rim·rikna man·e ja·mano Lumshnong police station-na aro ANTF team-na pakwatataha.

Iana skangrangoba, ua joloniko bang·bata changon niam gri napdrabagipa, mongsongbate Bangladesh-oni manderangko ma·sie a·jaona napbaako champengangtokahachim. Indiba niam ong·jani gimino, KSU-ni songgipa ILP checkgate-rangko police chipattokpilaha.

Indake ong·engon, KSU dolni ua jolo ILP-ko an·tangtangan songenba nirikkiataniko dakataniara BFR Act-ni ning·o Meghalaya a·doko ILP-ko gong·rake ra·gatatchina gita ma·mong sorkariko didina miksongani ong·achim. Union, apsandake Tongsen jolo niam gri napbagiparangko nirrikiatna gita Infiltration gate-ko bakbakan songe on·chinaba dabiangaha.