Shillong, April 1: Batanggimin chango a·songni skotong songjinma Delhi-china doange a·dokni dingtang dingtang mamlarangko agangrikbao Ma·mongni Home Minister Pa Amit Shah-ni March jani gisepon Meghalaya-ona wenbagen ine skotong minister-na ku·rachakatgimin donggenchimoba, adita dam a·dokrango da·omiting eleksinrangko ong·atna manchigimin dongani a·selo Home minister-ni wenbana am·aniko changgipinona dondipatchengaha.
Iani bidingo BJP doloni koborrangko on·atanio, adita dam a·dokrango eleksinrang ong·engani gimin Union Home Minister, Meghalaya-chi wenangna man·jawaha ine aganataha.
“Pa Amit Shah, eleksinni bidingo manderangna aganprakna gita dingtang dingtang a·dokrangchina songreenga, Assam-chiba ua baditaba chang wenangaha aro somoi choljokao ua, Meghalaya-chinaba wenanggen,” ine a·gipi BJP dolni dilgipa u·iataha.
Indake ong·engon, cabinet minister Pa Hamletson Dohling, Inner LIne Permit (ILP)ni gimin Union Home Minister Pa Amit Shah, uni chanchitangko srang-srang name talate on·na nanga ine dabiangaha.
ILP-ni gimin ning·tubate agan-chanchigrikna March jao ua changsatai Meghalaya a·dokona wenbagen ine skotong minister Pa Conrad Sangma-na uni (Amit Shah) ku·rachakatani ja·man chinga gimikan ka·dongbee ua salkon nichaksoengachim indiba da·o March ja bon·pilaha aro Pa Amit Shah sokbachipjaha ine aganenba, ma·mongni Home MInister-ara chingko indinsa ka·donggramataiahama, chinga ma·sina sikenga ine Pa Dohling aganaha.
Meghalaya a·doko Inner Line Permit (ILP)ko ra·gatani bidingo agan-chanchigrikna gita Ma·mongni Home Minister Pa Amit Shah-ni mija March jani gisepo a·dokona wenbana gita man·chipjahani gimin, ILP-ko dabienggipa dingtang dingtang dolrangko ka·a nangaona sokatan baksa a·dokko dingtang dingtang political dolrang baksa bakrime sorkariko rikpaenggiparangkoba iachi namen suk ong·atjaha.
Iani gisepon, “An·tangni ku·rachakata gita a·dokona ua (Amit Shah) wenbajahani gimin a·dok sorkari namen suk ong·jaha,” ine dakchakgipa skotong minister Pa Prestone Tynsong aganaha.
Janapna gita, a·dokni skotong minister Pa Conrad K Sangma iana skang, a·dok sorkari, Meghalaya a·doko Inner Line Permit (ILP)ko ra·gatani bidingo ma·mong sorkari baksa agangrikaniko dondikgijan dakangkugen ine a·dokni manderangna ka·dongataniko on·angahachim.
