Shillong, March 20: Assembly-o tom·ani bijangchio Voice of People Party (VPP)ni sakbri MLA-rangni ong·katgrime katani bidingo TMC-ni dilgipa Dr Mukul Sangma, an·tangni chanchianiko aganangpaengon, A·songo pilak daka-rikani bewal, torom ra·ani aro ku·sik agananirang namen dingtanganio pangchakesa u·igijagipa ku·sikko Governor-ni agananina VPP dolni padot an·tangni suk ong·gijaniko kamchi parakangaha ine aganaha.
“A·songni ning·o songdongenggipa pilak jatrangni ja·rikenggipa daka-rikani, ku·sik aganani torom ba ugitarango namen dingtanggrikani gnang, aro iasa mongsonggipa ong·a; uni gimin badiaba political dolrang manderangni nangnikani gita kamrangko ka·ani bewalrang gnang,” ine Pa Sangma parakataha.
Leader of Opposition (LO) ba warachakgipa dolo dilgipa ong·na gita seokchina TMC aro Congress dolni Assembly-ni agan-chalaitimgipana lekka sedoanggipani bidingo sing·skaon, House-ni ning·o aro a·palo pilak dakna nangani kamrangko aro daitangko chu·sokatna an·tangtangko tariani giminsa mongsonggipa chanchianide ong·enga, warachakgipa dolo sawa aro maidakgipa dilgipa ong·gen iani gimin ong·ja ine Pa Sangma aganchakangskaaha.
Assembly ning·o warachakgipa dol ong·e asongnasienggipa dolrang da·odipetde apsan asongrime chanchia dongkuja jekon pilak MLA-rangni gisik gnange chanchirimani ja·man chinga bang·a dingtang dingtangni gimin tik ka·aniko dakanggen ineba ua aganangkuaha.
Khasi aro Garo ku·sikrangko Indian constitution-o chapatchina dabienggipa mamlani gimin kamrangko da·oba ka·enga aro chu·sokkujana kingking chinga dakgrikangkugen ineba TMC-ni dilgipa Mukul Sangma u·iatangjolaha.
