Imphal, July 13: Indigenous Tribal Leaders Forum (ITLF) dol, Kuki-Zo manderangni kosako ma•mongni dolrangoni sinjetanirangko on•anirang batroroenganina, dingtang Union Territory-ko songe on•china dabie, Union Home Minister Amit Shah-na Sonibar salo chittiko on•ataha.
On•atgimin chittio, so•sojengjeng ong•engani gisepo sinjetanirangko chagrongna nangenggipa uamangni jatni gimin namrenge ra•egija gisik nange chanchina nangenga ine janpataha.
Jiribam-ni Phaitol song aro Mongbung songo, so•sojengjeng ong•anio sak 7 Kuki me•chikrangko Central Security Forces-rang doka sataha aro sak 2 chadamberangko uamang rim•angaha. Unbaksana, songko dilgipa L. Hengjol-ni nokko chadrapanina volunteer dongenggipa sak 3 songni Kuki manderangkoba uamang rim•aha aro sak 5 Kuki me•chikrangko doka satahachim jeni a•selan, uamangko sanna bananiko on•a gita Noney Hospitalona ra•angna nangpilao ga•akaha ineba ia chittio janapataha.
Iana agreba, Jiribam, Noney aro Tamenglong-ni Kuki Inpi-ni general secretary-ni nokko chel•chaksoenggipa dolrangan wa•al so•aha aro iani gisepon, gipin jatrang, Kuki-Zo manderangko bonatna mangsonge kam ka•skaenga. Da•alona kingkingba, Kuki-Zo jatrangni nok jamrangko uamangni wa•al so•e galanirangko nikna man•enga aro indake ong•engon, Central Security Forces-rang Kuki-Zo manderangko chel•chaksoenggipa manderangko rim•chimongskaenga.
Iani gisepon, National Investigation Agency (NIA) dolrangba, jattangko naljokatna chel•chaksoenggipa manderangkosa rim•chimongskaenga.
Indake, UNLF aro Arambai Tenggol-ni Meitei bobil dolrangni, tribal manderangko chadrapna sima arirangko batsotbaenganikoba nikna man•enga aro iandakgipa chadrapaoniko jatni aro nokdangni manderangko aro a•songni manderangna on•gimin bilrangko naljokatna gita silchidare ra•e chel•chaksona nangao ga•aka ineba uamang chittio janapataha.
Uni gimin, iandake chel•chaksoenggipa dolrangko uamangni rim•aniara kraani ong•jasan ong•aigija a•brirango songdongenggipa Kuki-Zo manderangna neng•nikaniko ra•baanisan ong•aia. Security Forces-rangni Kuki-Zo jolrangko sandianiko dakengmiting somoio, Meitei bobil dolrang a•dokni songjinmarango aro a•kawe jolrango re•roroskaaniko dakskaenga. A•dok Police aro Central Security Forces-rang, iandake bobil dolrangni garirango silchidare baksa nikchrakpile re•roroe Kuki-Zo jatrangko nosto ka•enganiko nikna gualskaenga ine ITLF-ni Chairman Pagin Haokip aganaha.
Manipur a•doko sipairangni sandirikitaniko dakanichi tom•tomaniko ra•bana man•jawa. So•sojengjeng ong•enganichi Meitei jatrangni sia bon•ani aro gimaaniara, Kuki-Zo jatrang tom•tom naljoke janggi tangani aro uamangni janggirang kenchakani ong•skaengani gimin, tom•tomaniko ra•bana gita, Indian Constitution-ni Article 239 A-ni ning•o pangchake Union Territory-ko Kuki-Zo manderangna songe on•china dabianiko ta•rakale chu•sokatchina ine Union Minister Shri Amit Shah-ko, ITLF-ni general secretary Munan Tombig mol•molataha.
Na·simang ia video-koba nina man·gen:
Na·simang iakoba poraina man·gen: World Population Day aro Stop Diarrhoea Campaign-ko South West Garo Hills-o a•bachengata
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub
