Shillong, 13 Dec: Mission Lakadong-ni ning·o Collective Marketing Centre (CMC)-rang aro Processing Unit-rangna tangka-paisachi dakchakaniko on·na gita, Upper Shillong-ni Meghalaya Agriculture & Management Extension Training Institute (MAMETI)-o Sombar salo programko ong·atgipao a·dokni skotong minister Pa Conrad K Sangma, Lakadong holdiko ge·gipa-gamgiparangna cheque-rangko suale on·angaha, jeon Agriculture & Farmers’ Welfare-ni minister Pa Banteidor Lyngdoh-ba dongpae bakko ra·angaha.
Programo bakko ra·gipa Jaintia Hills-oni Lakadong holdiko ge·gipa-gamgiparangni mikkango aganangengon, ru·utgija bilsirangna skang mangmang Jaintia Hills a·jao songdonggipa manderangni janggi tangani cholan koela mangmangchisan ong·aiachim ine aganenba, koelara man·taitaigipa gam ong·jani gimino manderangna pangkamgipa janggi tangani minggipin cholrangko ra·bana gita nanggen ine skotong minister parakataha.
Dingtang dingtang a·barango ka·mabatgipa gadangni organization-rangko sorkari tang·doatna gita jotton ka·enga aro dingtang dingtang kamrangchi joljolan uamangni man·gnirangkoba game cha·giparangna on·enga. Unbaksana, ge-chi·dok dingtang dingtang CMC-rangna aro ge·gni Processing Unit-rangna kror bongarangko suale on·anggen, jeoni lak 20-rangko karkanako chalaianio mongsong nanggipa kamrangna grant dake on·gen aro lak 10-rangko chu·gimik nanggipa korosna dakchakani gita on·skagen ineba Pa Sangma parakataha.
Iana agreba, tangka kror chikking prakchi holdi bikotani ge·gni kolkoba ru·utgijan a·jao a·bachengate on·anggen ine aganenba, bading-chiwalani kamo dakdil-ka·dilchina gita aro Lakadong Mission-ni bak ong·pachina gita iano bading-chiwalgiparangko jak on·pachinaba skotong minister ku·mongrimaniko on·angjolaha.
A·gilsakni dingtang dingtang bakrangchina Lakadong holdi-ko mamingo jajrengmangija watatna man·na gita, Organic Certification Centre aro Testing laboratory-rangkoba a·doko ru·utgijan songe on·anggen ine janapata baksana, Umroi aro Jengjal airport-rango donggipa Logistic Centre-rangna tangka-paisako on·aniba matchotnasiengaha aro ia Centre-rangan a·doko game-ge·e cha·giparangna uamangni man·gnigipa biterangko palatna namen dakchakbeani ong·gen ineba ua u·iataha.
Iana skang, Agriculture-ni Commissioner & Secretary Dr Vijay Kumar-ba Collective Marketing Centre (CMC)-rangni gita holdi bikotani kamrango a·jaoni game-ge·e cha·giparangna dingtang dingtang dakgipa kamrango jakkaltobegipa cholko on·gen ine aganangaha.
Salni programo dongpagipa gipinrangoni, Meghalaya Farmers Empowerment Commission-ni chairman K N Kumar, A Suting, Livelihood Improvement Finance Company of Meghalaya (LIFCOM)ni Chief Operating Officer, A Suting aro a·joltangoni Lakadong holdi-ko game-ge·e cha·giparangba an·tangtangni ma·siatang gita jinmao aganangaha.
