Shillong, Aug 23: Assam aro Meghalaya a•dokni simarango meligrikna man•jaenggipa biaprangoni damsa Langpih jolo bakan meli-nangrimaniko aro tom•tomaniko ra•bapilna man•gen ine ia jolni MLA Kimfa Marbaniang aro MDC Bajop Pyngrope, an•tangtangni ka•dongchakenganiko parakataha.
Ia jolrango meli-nangrimaniko ra•bapilna gita an•tangni ku•pattianiko on•angengon, kamrangko ka•anio pilakkon bak ong•atpana nanga ine MLA Kimfa Marbaniang didiataha.
Skanggipa bakni damdok biaprangko namatna kam ka•anio mitam songrangko gimaatna nangahaoba da•o gnigipa bako ia songrangko man•bapilna gita uamang krenge kamko ka•gen ineba Marbaniang parakataha.
A•dok damgnini gisepo meligrikna man•jaenggipa biaprangoni Langpih-ba mongsonggipa biap ong•enga ine janapatengon, ia meligrikgijanirangko namatna kam ka•anio nokmarangko, sordarrangko, himarangko aro gipinrangkoba bak ong•atpana nanga ine MLA aganaha.
Marbaniang-ni aganani gitade, ia songgigrikaniko manderangna ma•siatchenge on•ani ja•mansa, manderangni nangnikanirangkoba ra•na nangenga.
Apsan daken Langpih jolni MDC Bajop Pyngrope-ba ia jolrango ru•uta bilsirangoni meligrikgijaniko bakan namatna man•gen ine an•tangni ka•dongchakenganiko parakataha.
Dingtang dingtang dolrangni jingjengatanirangko aro manderangko ma•sisretatna jotton ka•anirangko nike an•tangni suk ong•gijaniko parakatengon, a•dokni bang•a songrangkon Assam-chipak man•angaha ine agananiara kakket ong•ja ine Pyngrope parakataha.
Meghalaya a•dok ning•o man•bagipa Tarabari aro uandakgipa biaprangni giminde maini gimin manderang golposkajaenga ineba ua sing•doangaha.
Meghalaya a•dokni song damgittamko gimaatna nangahaoba ia songrangko man•bapilna jotton ka•gen ine ku•rachakaniko on•angengon, gitcham sorkarini paprangni a•selsa da•alo iandakgipa obostako chagrongna nangenga ine Pyngrope parakataha.
