Shillong, Oct 16: Lawsohtun-o National People’s Youth Front (NPYF)-ni ong·atenggipa basketball kal·susaaniko Sonibar salo, Meghalaya a·dokni Chief Minister Conrad K Sangma, Mylliem constituency-ni MLA Hamletson Dohling baksa a·bachengate on·angaha.
Ia basketball kal·susaaniko a·bachengate on·anganio a·dokni Chief Minister, jinmana aganprakatengon, songsalo songdongenggipa manderangoni bang·batan chadamberangsa ong·ani gimin dingtang dingtang scheme-rang, program-rang, niamrang aro dingtang dingtang kamrangko chadamberangni namgninasa ra·gatna gita nangenga ine parakataha.
Kal·susaaniara chadamberangni janggi tanganio namen nangchongmotgipa bak gita ong·a ine janapatengon, kal·susaaniranga mandena kusinikosan aro an·seng baljokanikosan on·aia ong·ja indiba mandeni namgipa gun bewalrangkoba skie on·gipa ong·a ine Chief Minister aganaha.
Ia basketball kal·susaaniko me·chik aro me·asarangna dingtang dingtang dake ong·atenga aro kal·susaanio chegipa dolna gong 50,000-ko aro gnigipa biapko chegipana gong 30,000 tangkako boksis dake on·anggen.
