Nongpoh, July 22: Ri Bhoi a•jani Pillangkata aro Byrnihat jolrango, nangchongmotgipa lekkarang gri dokkan dakenggiparangko Bristibar salo, Khasi Hills Autonomous District Council (KHADC)-ni official-rang am•sandiangenba, ia jolrango niam gri chalaienggipa dam 500-na baten dokkanrangko rim•na man•aha.

Inspection ba am•sandianiko KHADC-ni enforcement inspector F Kharsyntiew dilangaha aro unbaksana assistant superintendent B Riahtam, Pilangkata jolko dilenggipa manderang aro Pilangkata police outpost-ni sipairangba dongpaaha.

Nangchongmotgipa lekkarang gri chalaienggipa dokkan nokgiparangko sal 15-ni gisepon, an•tangtangni lekkarangko mesokchina KHADC-ni enforcement department ge•etangaha aro sal 15-ni gisepo lekkarangko mesokna man•jagenchimode sal 30-ni gisepon uamangni dokkanrangko chipna mikrakataniko on•angaha.