Shillong, Feb 6: LP skulrango skigiparangni biap bangbang ong·e donggipao kolgapatani kamrangko a·dok sorkari ja·manchakatenga ine warachakgipa dolni dilgipani matnanganina a·dokni Education Minister Pa Lakhmen Rymbui, a·dokni dingtang dingtang lower primary skulrango skigiparangni biap bangbang ong·gipao gapatani kamrango ja·manchakata dongja ine aganangskaaha.
Warachakgipa dolni dilgipani janapanggimin gita, LP skulrango da·odipet jeba skigiparangni biaprang bangbang ong·enggipana seoke kamna rakkianio a·dok sorkari pangnaba ja·manchakata dongkuja ine agane, jerangni gimin warachakgipa dolni dilgipa matnanganirangko ra·baahachim uan kakket ong·srangja aro maming sakki grisa ine Pa Rymbui parakaha.
Adita salna skang Dr Mukul Sangma-ni matnanganiko dakangani gimin uni talatanio, a·dok gimikna sak hajal-sa (1000) mang LP skulni skigiparangko kamna rakkiangani bidingo a·dok sorkari da·o kamko ka·atenga ine ua agan-talataha.
Ian a·doko poraigipa chatro-chatrirangna skie-on·ani a·bao skigiparangko seoke kamna rakkidamaniba ong·enga ine aganenba, da·o jeon MTET porikkako seattaina nangenganio kamrang ong·enggipa East Khasi Hills aro Dagenggre sub-division-na agrede skigiparangko kamna seoke rakkiangani kamrang district gimikon matchotaha.
“Obostarang baksa chinga nigrike kamrangko ka·atenga aro somoi gita chinga skigiparangni biap bangbang ong·enggipa gimikon gapate seokgiminrangko kamo rakkianggen,” ineba Education minister Pa Rymbui ka·dongataniko on·jolaha.
