Shillong, June 30: Jolo songdongenggipa manderangni pangchake janggi tangenggipa Lukha chibima da•o acid brine tangsime ong•katengahani a•sel manderangna kenchakna nangani ong•engahani gimin ia chibimako rongtalatpilna gita a•dokni Forest & Environment department, ja•kurangko de•angna tik ka•aha.
A•dokni Forest & Environment Minister James Pangsang K Sangma-ni u•iatani gitade, ia Lukha chibimako rongtalatpilna aro tangkame rakkina gita uni department, United States aro Israel a•songni u•i-ma•sigipa manderang baksa agangrikjringe, cholrangko sandiengaha aro ia chibimao bringimin sambisirangko ra•galna gita ‘algae’-rangko jakkale dake nienga.
“Chingni dake nianio chinga chingni nangnikana baten chu•sokgipa ong•aniko nikenga aro mikkangchiba chinga iarangko dake niangkugen. Ia chibimanasan ong•aigija gipin chibimarang jeon, acid aro uandakgipa sambisirang brinahachim, uarangkoba chinga rongtalatna ja•ku de•anggen,” ine Sangma parakataha.
U•i-ma•sigipa manderang baksa mikkangchiba uamang agan-chanchirimanirangko dakna siengkuani gimin a•dokni nitogipa biaprangko nambate rakkiangna kamko ka•anggen ineba Forest Minister parakataha.
“Mikkangchi chingni kamrango chu•sokanirangko nikna ka•dongengon, ia kamo ching baksa bakrimchina gita chinga dingtang dingtang dolrangkoba didienga maina an•chingni samtangtango donggipa buring bolgrim, chiring chibisik aro ia pilakan an•ching pilaknin ong•a aro samtangtangko ripinge rakkianio an•ching pilakan ku•cholsan bakrimna nanga,” ine Sangma aganaha.
Janggi tangna kamrangko ka•e cha•engon, samtangtango ong•telaigiparangko ripinge rakkina nangani giminba a•dokni Forest Minister aganangaha aro pilak karkanarangkon, an•tangtangna dongimin niamrangko ja•rikchina gita didiangaha.
Indake ong•engon, Environment & Forests Ministry-ni bimingko Environment, Forests & Climate Change Ministry ine mingsrechina gitaba Sangma, a•dok aro ma•mong sorkariko didiataha.
“Climate change ba a•gilsakni dingtangrorobaenganiko namatna an•ching ta•raken kamko ka•na nangengaha aro iana an•ching sengchae rona somoi dongjaha,” ine a•dokni Forest & Environment Minister parakataha.
