Shillong, Oct 3: Lum Sohpet Bneng-o gong crore 18.82 ong•gipa Swadesh Darshan Scheme-ni kamrang matchotkujaenga ine Sombar salo, RTI ka•e am•sandigipa Disparing Rani parakataha.
Rani-ni kobor ra•timgiparangna parakatani gitade, ia kamrangni bidingo RTI ka•e am•sandiaton, kamrang 94 percent-ni gitade matchotaha ine Meghalaya Tourism Development Corporation (MTDC) u•iatahachim indiba ia biapona re•ange nion, ia project-ni bang•bata kamrangan matchotkujaenga ine ua nikna man•aha.
Ia kamko 2019 bilsini February jaon a•bachengate ja 18-ni gisepon matchotna gita somoiko donahachim indiba kamrangko ka•onan matchotkujaenga ineba Rani parakataha.
