Shillong, Feb 2: Jaintia Hills a•jani Lumshnong-o C&RD Block office-ko kulichina didie Budbar salo, Narpuh Border Area Joint Action Committee (NBAJAC), Meghalaya a•dokni Chief Minister Conrad K Sangma-na memorandum-ko on•angaha.
Chief Minister-ko grongeani ja•mano kobor ra•timgiparangna talataniko on•angengon, da•o Assembly-ni Budget Session-ko ong•atanio gital C&RD Block office-rangko kuliani bidingo Chief Minister parakatna ku•rachakaniko on•ataha ine NBAJAC-ni general secretary Daiapherbha Lamare parakataha.
Lamare-ni parakatani gitade, Narpuh border jolrango donggipa songrangara Meghalaya a•dokni diltubatsranggipa biaprangoni damsa ong•e sepangbatgipa block-rangoniba namen chel•grikani gimin ia songo C&RD Block office-ko kulina nangengachim.
Lumshnong songo C&RD Block office-ko kuligenchimode songni dilgiparang sorkarina dal•bea a•arang baksana baditaba gadang donggipa building-koba boksis dake on•na kusi ong•engachim ine NBAJAC-ni dilgipa aganaha.
