Shillong, Sep 16: Ru·uta bilsirangoni a·jani manderangni nangnike dabitokenggipa aro chanchie ra·bagimin Maternity and Child Hospital-ko South West Garo Hills-ni Mahendraganj songo rikataniko ru·utatengani gimin a·jani MLA Ma Dikkanchi D Shira-ni Assembly-o sing·doanganina, hospital-ko rikchakatna gita a·dok sorkari gong kror 14 tangkarangko on·ataha ine dakchakgipa skotong minister Pa Prestone Tynsong Bristibar salo u·iatangaha.
Songsul a·song Bangladesh baksa sima-ari chapchapo donggipa Mahendraganj songni manderang ru·uta bilsirangonin Maternity and Child Hospital-ko nangnike dabitokenga ine Ma Shira, House-o u·iataha.
Unbaksana, Mahendraganj songo donggipa Community Health Centre (CHC, a·jatangoni bi·sarangna aro oko kegipa ma·giparangna sana-bananirangko chu·onga gita on·na man·jaenga ineba Ma Shira janapatjolaha.
Iana, da·o health-ko jako ra·enggipa Pa Tyngsong-ni agan-talate on·anganio, Mahendraganj songo MCH-ko rikatani kamko ja·donggaatani a·selde a·ako man·anio neng·nikanirang dongani a·selsa ong·a aro ia mamla da·o matchotaha ine parakatan baksa, hospital-ko rikna gita Chapahati jolo on·gilgipa a·a acre 10 oni 12 mangko man·aha ineba minister house-o u·iatangjolaha.
