Shillong, June 28: Mairang Sub-Division-ko re·baenggipa August 15 tarikna skangan gital district songgnok ine Sombar salo Meghalaya a·dokni Chief Minister Conrad K Sangma parakataha.
“An·chingni a·doko Mairang-ba gital district ine mingako man·gnok indiba da·o dipet COVID-19-ni a·sel kamrang on·tisa ka·sinkuenga. Indake ong·genchimoba a·songni jakgitelaniko manina skangan chinga Mairang-ko district songna jotton ka·gen ine chinga Mairang-ni manderangna ku·rachakatenga,” ine Sangma parakataha.
Sohra civil sub-division-ko gital district songchina dabienggipani gimin sing·on, iani bidingo wa·rengko salna gita songgigrikanirangko dakna man·kujaengani gimin sorkari ja·kuko de·na man·kujaenga ine Chief Minister parakataha.
Ia bilsini March jao uni Mairang-o aganprakanggipa kattarangni gimin janapatengon, a·doko namroro silroroaniko ra·bana kamrangko ka·anio Mairang-an ka·mabatsranggipa gadango ong·enga ine ua janapahachim aro iani giminsa Mairang-o aro West Khasi Hills a·jani gipin bakrango songdongenggipa manderangni janggi tangani gadangko tang·doatna gita miksonge sorkari ia ja·kuko de·aha ine Chief Minister parakataha.
Garo Hills-o dingtang district-na dabienggiparangni gimin janapatskaengon, West Garo Hills a·jaba damsa dal·begipa a·ja ong·ani gimin a·dokni Power Minister aro Dadenggre-ni MLA James K Sangma, uko baditaba chang gronge Dadenggre-ko district songchina dabiani bidingo agangrikahachim ine Chief Minister parakataha.
“Uni gimin chinga pilakni gitan cholrangko nienga aro Power Minister-ba Dadenggre-na district-ko on·na nanga ine dabienga. Indiba sorkari da·o dipet iani bidingo maming ja·kurangko de·kujaenga,” ine Sangma parakataha.
