Tura, Dec 7: Tura-ni samba jolo donggipa Ganol chibimani Mandal Wari-ara manderangni picnic cha·ronggipa biap ong·ani gimin jolo songdongenggipa manderangni namgnina ia biapo Tourism department aro gipin line department-rangni dakchakanichi dingtang dingtang namdapatani kamrangkoba a·bachengatgen ine Sombar salni bako, North Tura-ni MLA Thomas A Sangma, Ganol chibimao donggipa Mandal Wari Fish Sanctuary-ko kulie on·angani somoio, ku·rachakaniko on·angaha.
Ia Mandal Wari Fish Sanctuary-ko kulie on·na man·ahani gimin an·tangni kusi ong·aniko parakatengon, jolo man·gipa dingtang dingtang rokomni na·tokrangko ripinge rakkina gita Ganol chiringni ia bakko Fish Sanctuary ba na·tok jilram dake on·ahani gimin Sangma, Fishery department-ko mittelpilangaha.
Chi ta·rakgipa biaprango na·tokrangko jilaniara namen dingtanggipa bewal ong·a aro ia bewalko gipin biaprangoba ja·rikna jotton ka·engoba chu·sokna gita man·jaenga ine janapatengon, iani giminsa gipin biaprangoni manderang iandakgipa biaprango na·tok jilanirangko nina gita re·batokenga, uni gimin joltangtangkoba name nitoe rakkina nanga ine North Tura-ni MLA, jolo songdongenggipa manderangko didiangaha.
Sangma-ni aganani gitade, ia jolrango rokom dokmangni gita na·tokrang gnang indiba ia jolrango manderang na·tokrangko rim·e cha·engani gimin na·tokrang jelrorona man·jaenga aro iandake na·tok jilchakani biaprangko donanichi na·tokrangkosan ong·aigija chirangkoba mikkangchi rongtale rakkiangna man·gen.
Ia na·tok jilchakani biapko a·bachengate on·angani somoio West Garo Hills a·jani Deputy Commissioner Ram Singh-ba dongpae jinmana aganprakengon, Meghalaya a·doko rokom 159-mangni gita na·tokrang gnang aro ia na·tokrangko da·onin ripinge rakkijagenchimode mikkangchi ia na·tokrang gimatokgnok ine mikrakataniko on·angaha.
