Tura, Feb 7: Songni manderangni jakoniko police-ni naljokatgipa mande saksako jinmani jako on·china dabiango sipairangni jechakani gimin ka·a nange police outpost-ko chadrapna gita kukkurirang, go·olrang  aro ro·ongrangko ra·bite tom·bagipa songni mande jinmako katbildangatna gita mijal Sonibar walo North Garo Hills police bangbango slaichi gopongpongna nangao ga·akaha.

Ia ong·anga obostara, district-ni skotong Resubelpara-oni km 12 mangna komigipa Tapa Darengchi songo ong·gija kamna miksonggipa ra·seke ra·gipa dolsa songni wilwilao jipjangenga ingipa koborko man·ani ja·man ong·aha. Koborko knae songni manderang walni somaio an·tangtang baksa kukkurirang, chakkkurang, gol·dikrang aro ro·rongrangko ra·bite songko nitima gita a·bachengtokaha ine koborko man·soaha.

Uamangni nitimengmiting somaio, saksa chu-ringe pekenba gisim jaket aro sipairangni longpant-ko kroke re·bagipa mandeko chagronge uamang uko ra·seke ra·gipa doloni ine potchipeming rang·san chadrapna a·bachengtokaha, indake ua mande adita mata-bu·anirangkoba man·aha. Indakmitingo, ua jolko nirokatenggipa police dolsa tik somaio ua mandeko jinmani jakoniko naljokatna man·e ja·mano uko Tapa Darengchi songni anti-dacoity camp-ona rimangaha.

Indake ong·genchimoba, songni manderang uko uamangni jako on·china police-o dabia gnang outpost-ko changduultokaha aro jensomaio ua mandeko uamangni jako on·na jechakon uno dongduulgipa mande jinmaan ka·a nange police outpost-ko ro·ongrangchi gotata baksana ning·china napangna jotton ka·tokaha aroba camp-na pakma dake tarie dongipa fencing kaakoba uamang okrurue galtokaha.

Ua somaio obostarang bate namjabatroroani gimino, mande jinmako katbildangatna gita police adita changna bangbango slaichi gopongpongna nangao ga·akaha jeni ja·manosa obostako tom·tomatna man·pilaha.

Indake ong·engon, mande jinmani jakchi bilongbee doka-sata man·e saknae dongenggipa aro uamangni jakoniko naljokatgipa mandeko ja·mano sanna gita hospital-ona rimangana man·aha ineba koborko man·sodapaha.