Tura, July 3: Salgnina skang, Selsella block-oni re·bapilenggipa mande saksako rim·srukna jotton ka·gipa mande sakgittamko Sonibar salo, West Garo Hills a·jani police-rang rim·na man·aha.
June 30 tarik attamni 5:30 bajimango, Selsella Development Block office-o tom·a matchote re·bapilengmiting somoio mande saksako Rajabala police outpost-ni ning·o donggipa Sakmal songni Nur Alom aro Kandegaon songni Nazidur Islam minggipa mande sakgni chadrapsoaha ine July 1 tariko Selsella police outpost-o kobor man·soahachim.
Ia mandeko uamang Haldibari songo chadrapsoenba, gari bolsao siknape rim·srukna jotton ka·ahachim indiba ua uamangko dakgrikchake uamangoni jokna man·ahachim.
Ia mande sakgni ja·mano sakgipin mandeko rimdapenba, ia mandeko Haldibari aro Babetpara songni gisepo donggipa ramao chadraptaiahachim indiba ua somoio mande sakbri ua biapona sokbachangenba, ia mandeko jokatna man·aha aro uko uni nokona tom·tome rimange donaha.
Iani bidingo koborko man·soa bakan police-rang, rim·srukna jotton ka·gipa manderangko sandie, Sakmal songni bilsi 23 ong·gipa Nur Alom, Bhalgaon songni bilsi 22 ong·gipa Moshaidul Sheikh aro New Bhaitbari songni bilsi 23 ong·gipa Nazidur Rehman-ko rim·na man·aha ine kobor on·aha.
