Shillong, Apr 13: Assam aro Meghalaya a·dokni simarango meligrikgijaniko namatna gita a·dok damgnini soi ka·grikanio Meghalaya a·dokni mitam songrangko Assam-o napatenganina ia jolrango songdongenggipa manderang sorkarini kosako jegaltokengani gimin dolgni sorkarirangni soi ka·grikgipa MoU-ko den·galpilkujaskal uamang jegalangkugen ine Budbar salo Opposition dolni dilgipa aro All India Trinamool Congress (AITC)-ni dilgipa Mukul Sangma parakataha.
Sangma-ni parakatani gitade, a·dok damgnini MoU-o soi ka·grikaniko AITC dolmangmangsan jegalenga ong·ja indiba a·dok gimikon iako jegaltokengachim.
Mongolbar salo Ri Bhoi a·jani simarango donggipa dingtang dingtang songni dilgiparang, Secretariat mikkangona re·bae sorkarini kosako jegalanggipani gimin janapatengon, ia songni dilgiparangna a·songni dongimin niamo pangchake bilko on·manahani giminsa da·alo, an·tangtangni songrangko gipin a·doko napatenganina sorkarini kamko jegaltokenga ine AITC-ni dilgipa parakataha.
Ia songni dilgiparangko grongna gita somoiko on·jahani gimin Chief Minister-ko sing·doangengon, “Maiko chief minister, uamangna aganchakna miksongenga? Khanapara-ni wa·rengko Mukul Sangma-sa salahani gimin anga iako Assam-na on·atna tik ka·aha ine aganenma? Maio pangchake ua ia songni dilgiparangna aganchakna miksongenga?” ine Mukul sing·doangaha.
