Shillong, May 4: Da·o dipet Meghalaya a·doko manderangni nangchongmotgipa bosturang chu·onga gitan dongenga ine manderangko jajrengjachina gita a·dokni Deputy Chief Minister Prestone Tynsong didiataha.
Tynsong-ni u·iatani gitade Pradhan Mantri Garib Kalyan Anna Yojana (PMGKAY)-ni mirongrangkoba ma·mong sorkari, May aro June jagnina on·dapataha aro da·o mirongrangko FCI godown-oniko salna a·bachengengahani gimin bakan mirongrangko sualatgnok.
AAY aro PHH gadangni ration card donggiparangna ia mirongko nokdangni mande sakpraknan kg 5 ka·e sualatgen ineba Deputy Chief Minister parakataha.
A·dokni manderangko COVID tika su·ani bidingo janapatengon, a·dok sorkari pong 42,000 tikarangna tangkarangko gamatmanaha aro bakan ia tikarang a·dokona sokbagnok ine Tynsong parakataha.
Bilsi 18 batgipa manderangnaba COVID-ni tikarangko sorkari hospital-rangode indin su·gen indiba private hospital-rangode dingtang niamko ja·rikangskagen ineba Deputy CM parakataha.
