Manipur, July 1: Mikka dondikgija waanichi Manipur a•dokni Noney districto a•a ruronge sak 50 na baten manderang gimaaenga aro sak 19ni manggisirangko sukrobar salo man•aha. Sorkarini kobor ra•timgiparangoni aganani gitade sak 80 mangni manderang ia a•a rurongao dapako man•a kenchakani donga. Ia a•sel ong•gipa biapona naljokatgipa dolrang sokange dakchakaniko on•aha aro saknaako man•giparangnaba jokgipa biaprangona ra•ange sana-bananiko on•enga. Manipur a•dokni skotong minister N. Biren Singh a•sel ong•chakgipa biapona re•ange nieaha. ” A•a rurongdape duko ga•akenggiparangna sorkarini gita nirokaniko on•gen. Minister rang, MLA aro officialrang iako namedake niroken kam ka•gen. Sak 50 na baten manderangni manggisiko man•kujaenga iako bakbakan bikote aro am•sandie on•gen, ian aiao inmanpile duk ong•ani katta ong•a” skotong minister N. Birensingh uni twitero parakataha.

Manipur a•doko da•ororo mikka wae neng•nikaniko man•engon, a•bri aro ramarangna simsakna aro songre-songbatao simsakpachina Noney districtni district administrationoni mikrakataha.