Imphal, June 5: Manipur a·dokni Kangpokpi a·jao songni mande saksako Assam Rifles dolni major saksa so·ote galahani gimin songni manderang ka·a ding·chaoe, Assam Rifles-ni gari bolgni aro AK 47 rifle ponggniko so·e galan baksana sipai dolni a·tiprangko chadrapeaha ine Sonibar salo police-rang kobor on·aha.
Police-rangni u·iatani gitade, Sukrobar walo Assam Rifles-ni major baksana sipai sakbri, ramram ganding chindingrangko gane, Kangpokpi police station-ni ning·o donggipa Chalwa songni bilsi 36 ong·gipa Mangboilal Lhouvum-ni nokko chadrapeaha aro ja·mano uko nokoniko rimongkatbae goe galaha.
Ia mandeko goe galangani ja·man bakan songni manderang uko sepango donggipa hospital-ona ra·angahachim indiba hospital-ona sokangon uko siaha ine doctor-rang parakataha.
Koborko on·ani gitade, ia mandeara salo hajra ka·e cha·gipa mandesan ong·aiachim aro ua bi·sa sakgnini pagipa ong·achim.
Indake ong·engon, Assam Rifles-ni major-ko rim·angenba ja·mano police-rang ia a·selni bidingo mokordomako ka·aha ine u·iataha.
Assam Rifles-ni major-ko police-rangni rim·angengmiting somoioba songni manderang uko chadrapna jotton ka·ahachim.
Ia a·selni bidingo police-rang aro Assam Rifles-ni gitaba talatna jechakahani gimin maini gimin ia obosta ong·ahachim name ma·sina man·kujaenga.
