Shillong, Aug 31: Hynniewtrep National Liberation Council (HNLC) bobil dolni gitcham dilgipa Cheristerfield Thangkhiew-ko so·otgalanio jak donggipa police officer-rangko kam ra·galchina dabie ‘Ka Sur Ki Nong Mawlai’ ba Mawlai jolo songdongenggipa manderangni ku·rang dolni dilgiparang, MDA-ni sak 35 MLA-rangko gronge, kakket bichalko on·china dabie segipa chittirangko on·na a·bachengaha.
Skanggipao uamang, Mongolbar pringni 10:30 bajimango Congress dolni MLA PT Sawkmie-ko grongechengaha aro uni ja·man Adelbert Nongrum-ko grongeaha.
Iani ja·mano Mawlai-ni dilgiparang, AL Hek, Banteidor Lyngdoh, Hamlet Dohling, Renikton Lyngdoh, Pius Marwein, Sanbor Shullai aro gipin MLA-rangkoba grongeaha.
‘Ka Sur Ki Nong Mawlai’-ni membor Marbud Dkhar-ni u·iatani gitade, so·ote galako man·gipa HNLC-ni gitcham dilgipa Cheristerfield Thangkhiew-na kakket bichalko on·na man·na gita ku·rangko on·china didie uamang, MDA-ni minister-rangna uamangni segimin chittirangko on·aha.
“Cheristerfield-ko so·ote galani bidingo jegale ku·rangko on·china gitasa chinga Khasi aro Jaintia MLA-rangko nangnikenga. MLA-rang manderangna chakgenma ma manderangni kosako re·gen chinga da·o ong·atna sienggipa Assembly session-o nigen,” ine Dkhar parakataha.
Cheristerfield-ko so·otanio jak donggipa police officer-rangko kamoniko ra·galna CM jegalaha aro judicial inquiry-kosa dakchina ge·etaiaha ineba Dkhar aganaha.
“Ia a·selni bidingo jakgitelgipa aro kakketgipa inquiry-ko dakchina chinga nangnikenga. Chingni dabianiko sorkari knachakjagenchimode chinga bilakbate jingjengatangkugen aro ia changode Secretariat-ni pakmarangba mogen,” ine Dkhar aganaha.
