Shillong, July 6: Shillong songjinmani Mawlai Nongkwar-o jabol galaniko nirok sandianirang dongjaengani a·sel Mawlai-o songdongenggipa manderangni an·seng baljokanina kenchakna nangani ong·enga ine Mongolbar salo jolo songdongenggipa manderang, a·dokni Urban Minister Sniawbhalang Dhar-ko grongenba, ia biapo jabol galaniko nambate nirok sandichina didiangaha.
Mawlai jolko dilenggipa manderangni parakatani gitade, Jaintia Hills-oni jabol galgipa truck garirangba ia Mawlai Marten-onasa ra·bae jabolrangko galenga ine koborko man·soahani gimin jolni dilgiparang, ia biapko re·ange nion, ia biapo Waste Management Plan-ni niamrangko ja·rikgijasa galenga aro uandaken jabolrangko so·e galanio ia jolo songdongenggipa manderangna namgijaniko ong·atenga ine nikna man·aha.
Indake ong·engon, a·dokni Urban Minister-ba an·tangan ia biapona re·ange niegen aro mikkangchi jabolrangko nambate galna ja·kurangko de·anggen ine Mawlai jolni dilgiparangna ku·rachakaniko on·ataha.
