Shillong, Nov 21: Ri Bhoi a·jao donggipa Mawlyndep community centre baksana BioFloc Fish Tank-rangko Sonibar salo, Meghalaya a·dokni Chief Minister Conrad K Sangma nokdonggae on·angaha.
Ia community centre aro BioFloc Fish Tank-rangko kulie on·angani somoio a·dokni Chief Minister, jinmana aganprakangengon, ia Mawlyndep songara a·doko damsa rotobatsranggipa biap ong·ani gimin ia biapo tourism-ko tang·doatna gita cholrang bang·en donga ine parakangaha.
Mawmaram-ona dakanggipa ramako taridapna gong kror 15 tangkarangko World Bank, chamatahani gimin ian ia jolrango Tourism-ko tang·doatna dakchakani ong·gnok ineba Chief Minister parakataha. Mawmaram-oni NEPA Junction-ona km 41.527 ong·gipa ramako MTIP-ni ning·o gong kror 64 koros ong·e tarina siengachim aro ia kamko 2024 bilsini November jao matchotatna ka·dongsoenga.
BioFloc Fish Tank-rangko kulie on·anganio Chief Minister, jinmana aganprakangskaengon, Meghalaya a·doko manderangni cha·batgipa be·enara na·tok be·enan ong·a maina bilsiprakon metric ton 30,000-mangni gita a·doko na·tokko cha·enga ine parakangaha.
Bilsiprako ton 30,000-mangni gita a·doko manderang na·tokko cha·engoba 50 percent-mangni gitasan a·doko man·engani gimin a·doko na·tokrang chu·ongjaenga ine Sangma parakataha.
