Shillong, April 13: National Livestock Mission (NLM)-ni ning•o Poultry Farm-ko East Khasi Hills a•jani Mawryngkneng-o kulina gita Mongolbar salo, Meghalaya a•dokni Deputy Chief Minister Prestone Tynsong-ni jakchi pangchakaniko songe on•angaha. Iana pangchakaniko songe on•angani somoio jolni MDC aro KHADC-ni Chairman Pyniaid Sing Syiem baksana Animal Husbandry & Veterinary department-ni official-rangba dongpae bak ra•angaha.
Pangchakaniko songna gita program-ko ong•atanio a•dokni Deputy Chief Minister, jinmana aganprakangengon, pangkamgipa namroro silroroani aro an•tangtango chu•ongnikaniko ra•bana nangani gimin aganangenba, a•doko game ge•e cha•enggipa manderangko dakchakna aro a•doko namroro silroroaniko ra•bana gita sorkari dingtang dingtang cholrangko ra•gatenga ine parakangaha.
Meghalaya a•doko bakan Poultry Mission-ko a•bachengatgnok ine parakatengon, ia mission-ni namgnirangko ra•china gita Tynsong, jolo songdongenggipa manderangko didiangaha. Mawryngkneng-o rikenggipa poultry farm-ko farming hub-ona ra•doatgen aro ian East Khasi Hills a•ja gimiknan namgni ong•gen ineba Deputy Chief Minister parakataha.
Iani ja•mano ua, East Khasi Hills a•jani Sohryngkham-o donggipa Stockman Centre-ko NABARD loan-ni ning•o Veterinary Dispensary-ona ra•doatna gita a•dokni Deputy Chief Minister Prestone Tynsong, pangchakaniko songe donangjolaha.
Ia tom•anioba ua jinmana aganprakengon, dispensary-rangara sanna bananiko aro samrangko on•chakgipa biaprangsan ong•ja indiba manderangna pangkamgipa janggi tangani cholrangko aro man•dapanirangko on•na gita u•i-ma•siatanirangko on•aniba ong•a ine parakangaha.
Veterinary dispensary-rango on•enggipa dingtang dingtang cholrangko an•tangtangni namgnina ra•china gitaba ua jolo songdongenggipa manderangko didiangaha.
