Shillong, September 27: Mongolbar salo, Mawsynram Border Area College-ni bilsi 25 gapaniko manianio Meghalaya a•dokni Skotong Minister Conrad K Sangma-ba bakko ra•angpaaha.
Today we unveiled the bust of Shri Shrolenson Marbaniang, the founding father of the College.
Bah Shro was a farsighted leader who was sensitive to the needs of the people in the border area. MBAC will remain one of his greatest legacies. pic.twitter.com/SlQfVIfh7T
— Conrad Sangma (@SangmaConrad) September 27, 2022
Ia Mawsynram Border Area College-ara sima jolrango songdongenggipa aro chol ong•pagijagipa manderangna bilsi 25-na skang kuligipa college ong•achim.
Mawsynram Border Area College-ni bilsi 25 gapaniko manianio a•dokni Skotong Minister, ia college-ko kulidilchenggipa Shrolenson Marbaniang-ni statue-koba oprake on•angjolaha aro ia manianio ua jinmana aganprakengon, ‘Bah Shro’-ara sima jolrango songdongenggipa manderangni nanganirangko ma•sigipa aro niksamsoe kamko ka•gipa mande ong•achim ine parakangaha.
Uni mingnamgipa kamrangoni ia Mawsynram Border Area College-ba mingsa ong•a ineba ua aganaha.
Lekka porako tang•doatna gita sorkarini ka•enggipa kamrangni gimin janapatengon, bilsiantian sorkari, a•dokni budget-oniko 15 percent bate lekka porani kamrangna chamenga ine Skotong Minister parakataha.
Lekka porako tang•doatna gita kamko ka•anio dingtang dingtang ra•biani aro neng•nikanirangko chagrongna nangengoba sorkari, a•doko pilakni gitan lekka porani gadangko nambatatna on•kange kamko ka•enga ine Skotong Minister parakataha.
Ia college-o poraienggipa chatro chatrirangan ia jolni manderangna pattianiko ra•baskagiparang ong•china aro jolni namroro silroroanina on•gilangkuchina ineba Skotong Minister, an•tangni namgipa skaniko parakataha.
‘Sorkarini daito gnanggipa ong·anio, chinga education-na mikpakma nie kamko ka·atenga. Ia a·bao namen ra·bianirang gnang, uni gimin bakkandikgipa somoio pilak neng·nikanirangko namatgopnade sorkarinaba altua kam ong·ja, indimangba dingtang dingtang dakgipa cholrangchi education-ko namdapatna gita re·mikkange chinga pilak ra·bianirangko chile kamrangko ka·enga’, ineba skotong minister aganangkuaha.
‘Ian mingsa nangchongmotgipa aro chu·sokatna namen rakbegipa kamba ong·a. Bilsianti Meghalaya sorkarini koros ka·enggipa budget-ni chu·gimik gong kror 16,000-oniko, dingtang dingtang skulrang, college-rangko chalaianio gong 2500 tangka-paisarangko jakkalenga baksanaba minggipin nanganirangoba bilsiantin koros ong·enga. Indita tangka-paisarangko jakkale education-na tangka-paisa chamaniko niatgenchimode, ia dingtangmancha a·bana sorkarichini gisiko nange kam ka·aniko nikna gita man·gen’, ineba skotong minister agandapataha.
Indake ong·engon, pilakni gita sorkarichi jotton ka·anirang dongoba, a·doko skia-porani a·bao tang·doaniko nikna gitade iano bak man·gipa sakantian apsangrik daito gnanggiparang ong·a ine Pa Sangma janapataha.
‘Education-ni a·bao an·ching bang·aan bak man·pagiparang ong·a, beben sorkarini gitade politicalni dilgiparang aro official-rang bak donga, unbaksana skigipa dol, gimikni gitara songsal ong·a aro bi·sarang baksa bang·bate somoiko re·atgipa ma·gipa-pagiparangba bak donga. Education-ko namdapatna gita, songsalni dingtang dingtang bak donggiparangan apsangrik ong·e kamko ka·na nanggnigiparang ong·a’, ine ua parakataha.
Chua gadango poraiani biap jekai college-rangko niatgenchimode, Shillong aro Tura aro gipin district-rangonikosan an·ching bang·e nikna man·aia, jeni a·sel songadamo poraigipa chatrorang iandakgipa college-rango poraipana gita cholrangko man·breja ine janapatengon, songadam biaprangoni chubata gadango skie ra·dapanirangko dakna nangnikgiparang bang·roroengani gimin uamangna cholko on·na, songadamo higher education-ko bariatna gitaba sorkari man·adipet chol-ramarangko sandie kam ka·atenga ineba skotong minister janapatkuaha.
Unomiting tom·bimonganio, a·dokni skotong minister Pa Conrad K Sangma baksana Rajya Sabha-ni MP Pa W.R. Kharlukhi, Education Minister, Pa Lahkmen Rymbui aro gipin niksenggipa a·dokni dilgiparang, Mawsynram Border Area College-ko ua biapo kullichenggipa membor Shrolenson Marbaniang-ni bimangko tarigimin noksako oprakate on·angan baksa, college-ni Silver Jubilee souvenir-koba oprake on·angjolaha.
