Shillong, Sept 16: Meghalaya a•dokni Mawsynram constituency-ona Bangladesh a•songni manderang niam gri napdrabaenba, ma•manti ong•gija kamrangko ka•rongenga ine Bristibar salo, Mawsynram-ni Congress MLA HM Shangpliang, mikrakataniko on•angaha.
Shangpliang-ni parakatani gitade, Mawsynram constituency-ni Hatmawdon songo infiltration camp damsa dongachim indiba ia camp-ara international border-oni adita kilometre-rang chel•grikani a•sel maming kamni ong•jaenga.
“Ia infiltration camp-o giseposan gipin biaprangoni niam gri napsrukbagipa manderangko rim•na man•enga aro bang•bata somoirangon ia camp-o kamko ka•enggupa police-rang, aratesa asonge dongtokna nangaienga ine anga iani bidingo a•dokni DGP-naba u•iatmanahachim. Iandake nanggijagipa biaprango infiltration camp-rangko donani pal outpost-rangko kulina man•ode nambatgenchim,” ine Shangpliang, Assembly-ni Autumn Session-o aganaha.
Mawsynram MLA-ni parakatani gitade, sin•karini somoirango Bangladesh a•songoni bang•bea manderang, ia jolrangona napdrabae, Meghalaya a•dok ning•o ge•enggipa guerangko ake katangrongenga aro ia manderangara silchidarerangko ra•esa jinma jinma re•baengani gimin infiltration camp-o donge nirokenggipa sipairangba mamingkon dakna man•jaengachim.
Iani ja•man, Gambegre-ni MLA Saleng Sangma-ba ia chanchirimanio bakko ra•angpaengon, Rohingya refugee-rangba lakni lak manderang donga ine ia refugee-rangnaba mikrake dongchina sorkariko didiataha.
Gipin biaprangoni napdrabaenggipa manderangko nambate nirok sandina man•na gita sima jolrango nirikkianiko bilakbatatchina gitaba Sangma, sorkariko didiangaha.
