Shillong, May 21: Meghalaya a•doko National Food Security Act (NFSA)-ni ning•o namgnirangko man•enggipa sak 21,45,145 manderangna May aro June jagnini mirongrangko on•dapgen ine Sukrobar salo, Meghalaya a•dokni Deputy Chief Minister Prestone Tynsong parakataha.
“Re•anggipa bilsio gitan ia bilsioba India sorkari, May aro June jani NFSA mirongrangko on•dapataha. Meghalaya a•doko NFSA-ni namgnirangko man•enggipa gimik sak 21,45,145 manderang donga aro uamangna ia mirongrangko sualatgen,” ine Tynsong parakataha.
COVID-19-ni chinrang donggenchimode an•tangtangko porikka ra•e nichina gitaba ua a•doko songdongenggipa manderangko didiataha.
“Sabisiko man•ahaode nirok sandianio neng•nikanirangko chagrongna nangronga, uni gimin sabisini chinrangko nikenga ong•ode an•tangtangan re•bae porikka ra•e nichina chinga manderangko mol•molatenga. Sabisini chinrang donggenchimode noktangtangoni ong•katgija dingtang nape dongchina aro health worker-rangna u•iatchina gitaba chinga didienga,” ine Deputy Chief Minister parakataha.
