Shillong, April 27: Ma·mong sorkarini a·bachengatgipa Jal Jeevan Mission-na tangka-paisa chamatgipako Meghalaya sorkarini name jakkalahani gimin, kamo didianiko on·angkuna gita ma·mong sorkari a·dokna tangka gong kror 10-mangko ia apsan kamna on·dapataha ine Public Health Engineering (PHE) minister Pa Renikton Tongkhar, Mongolbar salo u·iataha.
Ia Jal Jeevan Mission-ni kamrangni gimin nipiltaiataniko dakna a·dokni skotong minister Pa Conrad Sangma, tom·aniko dakdile agan-golpogrikangaha.
Tom·anio, Jal Jeevan Mission-ni ning·o ia 2021 aro 2022 bilsini gisepon ge 3,38,903 mang nokdangrangna chirangko matchote sale on·na gita department nisanko donsoaha ine Pa Tongkhar u·iataha.
Pa Tongkhar-ni aganani gitade, ia 2021 bilsini April 25 tarikona, JJM-ni ning·o gimik-gimang ge 97,000 nokdangrangna ringani chirangko sale on·manaha. “Ia bilsini gisepon, chirangko sale on·na nangkuenggipa ge 2,41,903 mang nokdangrang dongkuenga,” ine Pa Tongkhar parakataha.
Da·odipet, ia scheme-na gimik-gimang tangka gong kror 208.74 mangko Meghalaya a·dok man·soaha, indake a·dokni dingtang dingtang man·gnionikoba gong kror 20.44 mang tangka-paisarangko ia kamna on·gilpaaha.
