Shillong, Dec 4: Manderangni namgnina ma·mong sorkarini dakchakatgipa tangka-paisarangoniko bang·a namgnirangko man·na gita aro je tangka-paisarangkon central exchequer-oni on·atenga una, da·ode a·dokni mande sakantion Aadhaar identity card-rang dongna nangchongmotaha.
Ma·mongni dingtangmancha on·atgipa scheme-rango maming cha·bokani aro donmitapani gri niknangrao kamrangko ka·atna man·na gita sorkari, Aadhaar-ko gong·raken tarie ra·tokchina gita manderangko aganaha. Indake ong·engon, “One Nation One Ration Card” System, iandakgipa scheme-rangniko bang·a namgniko man·gnigiparangko dingtangmancha u·ina gita Aadhaar-ko nangtelaha.
Scheme-rang jekai Direct Benefit Transfer (DBT) aro Pradhan Mantri Ujjwala Yojana ba ugita dakgipa ma·mong sorkarini on·atenggipa gipin scheme-rangnaba da·ode Aadhaar baksa nangdimattokaha ba nangdimatani kamrang da·o ong·engaha, ine Center Supervisor, Batjubanlang Khongwar aganaha.
Indake ong·engon, da·odipet a·doko mangmang ge 304 Aadhaar registration kit-rangsan dongkuaienga jeni a·selan kamrangko ka·atanioba namen ra·bianirangko chagrongna gita nangskaienga.
A·doko, Aadhaar-na biming segatgiparang namen komiani gimin, bang·a manderangko salna man·na gita a·dokoni centre-rang online gita kamo rakkianikoba a·bachengataha. Aadhaar-ko da·o nangchongmotahani gimin aro biming segataniko baridapatna gita a·dok gimikchin Aadhaar unit-rangko bang·bate a·bachengataha ineba ua talataha.
Meghalaya a·dok gimiko a·bachengatgipa adita ge gital centre-rangoni skotong songjinma Shillong-ni Rynjah-o a·bachengatgipa kendra-ba uarangoni damsa ong·paa. Ia apsandakgipa centre-rang mikkangchide Garo Hills, Khasi-Jaintia Hills aro Ribhoi district-rangonaba sokbaenga ine Center Supervisor, Batjubanlang Khongwar aganaha.
