Tura, Jan 25: Meghalaya Board of School Education-ni ning·o skina gita tarigipa NCERTni ki·taprangko Teachers Initiative Conclave-ko Harding Theological Collegeo ong·atanio Chief Minister Conrad K Sangma aro Education Minister Rakkam A Sangma oprakre on·aha. Tom·anio MLA Rupert Momin, Sanjay A Sangma, Arbinstone Marak aroba MBOSE aro Education Departmentni officialrangba dongpaaha.
Ia Teacher Initiation Conclave-ko ong·atanio Chief Minister aro Education Minister sak 458 gital LP School Teacherrangna appointment letter-rangko on·aha. Roster systemko ra·gate ja·rikani ja·mano ian skanggipa changna sorkarini kamna mande seokani ong·enga.
“Sorkariko chalaigipa ong·e, chinga songadam nokadamrango lekka porako on·ani bidingo nambatatna kingkot ong·a aro ua kamna namgipa skigiparangko seokanian poraigiparangko dambeonin nambate ra·dona man·anichi lekka porako on·ani a·dok gimikni gitan nambatrorogen,” Chief Minister aganaha.
Lekka-porako on·anian dingtanggipa bimang aro gadangona ra·doani kamo mongsongbatgipa ong·a aro ian a·dokni manderangna sorkarini niksamsoaniba ong·a ine ua aganaha. “Batanggimin bilsi bongao bite gnanggipa songrebaani ong·aha, chingni sorkari namemanchaan miksonga aro a·dokko nambata gadango sokangatna kamrangko ka·enga.”
Sorkarini kam ka·ani bewalko janape Chief Minister aganaha, “Batanggimin bilsi bonga chingna namen ra·biani ong·aha indiba sorkari ong·e chinga manderangni janggi tanganiko dingtangatna kingkot ong·a. Meghalaya a·songni nambatgipa dam 10 a·dokrangni damsa ong·gen ine chinga an·tangtangna aganronga. Darangan nokgri ong·jachina, pilak songrangonan rama dongchina, nokantionan chi jokatna, a·dokni pilak bakon mobile man·china gita chinga miksonge kam ka·enga. Manderangna nambatako dangdike on·na gita chingni kam ka·ani ja·ku aro gisikba ong·na nanggen.”
New Zealand aro Meghalaya-o mande jelaniko togrike ua aganaha, “New Zealand-o mande jelani sak 52 lakh ong·a, Meghalaya-o mande jelani sak 38 lakh ong·a; an·chingni economy-de 5 billion dollar, jean 40,000 cr mang ong·a; indake ong·on New Zealand-ni economy-de 300 billion dollarmang ong·a jean an·ching chang 20 mang bata”.
New Zealand gita chu·sokanggimin a·songranga mandeni gadangko tarina gita education, research aro technology-o tangka bang·en jakkala, aro a·dok damsa ong·e Meghalayaba education-ko mongsongbatgipa ong·e ra·e unan tangka paisako jakkalenga ineba ua aganaha.
“Batanggimin bilsi 45na an·chingni a·doko education-ko nanga gita simsakani gri ong·aha. Namroro-silroroaniko ra·bana miksonge chingni sorkari educationko mongsongbatgipa ong·e ra·e unan tangka-paisa jakkalna a·bachengaha. Chinga poraichakram nokrangko aro mandeko tariatanio namen bilake kam ka·enga,” Chief Minister aganaha.
Iakoba poraie nina man·gen: Ampati-ni Multi Facility Centre-o National Voters’ Day-ko mania
WATCH:
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
