Shillong, June 28: Mawmluh Cherra Cements Limited (MCCL)-o kamko ka•enggipa manderangna da•o antisani gisepon dormaharangko on•jagenchimode jingjengatanirangko a•bachengatgnok ine Mawmluh Cherra Cements Employees Union (MCCEU) ka•mikkenataniko on•ahani gimin MCCL-o kam ka•enggiparangna dormaharangko on•na man•na gita jagittamprakon gong kror 2 tangkarangko MCCL-na on•na sorkari ku•rachakataha ine MCCL-ni Chairman aro Jowai-ni MLA Wailadmiki Shylla parakataha.
Iani bidingo kobor ra•timgiparangna talataniko on•angengon, a•dokni Chief Minister Conrad K Sangma aro MCCL-ko chalaienggipa manderangni gisepo tom•e chanchirimangani ja•man, MCCL-o kam ka•enggiparangna dormaharangko on•na man•na gita gong kror 2 tangkarangko jagittamprakon MCCL-na on•na manchiangaha ine Shylla parakataha.
Shylla-ni aganani gitade, re•anggipa antio MCCL-o kam ka•enggipa manderang, MCCL-ni official-rangko grongenba, an•tangtangni dormaharangni bidingo a•dok sorkarini gita dakchakaniko on•china didiangahachim.
Uandaken, MCCL-o kam ka•enggiparangna dormaharangko on•na man•na gita a•dok sorkari, gong kror 2 tangkarangko jagittamprakon on•na ku•rachakaha aro MCCL-o man•enggipa neng•nikanirangko namatna man•kujaskal sorkari iandake dakchakanirangko on•angna ku•rachakataha ine MCCL-ni Chairman parakataha.
MCCL-o nangrime chalaiani bidingo janapatskaengon, MCCL-ko nangrime chalaina gisiko nangenggipa dolgni company-rangko da•o July 18 tarikni gisepon re•bae, an•tangtangni miksonganirangko mesokechina u•iataha ine Shylla parakataha.
