New Delhi, Dec 3: Similgipa bibarangchi ku·chi mittap dakpile cha·toatna dingtang dingtang rokomrangoniko ra·chimonge tarigipa moslarangko bikotanio mingsinggipa mande aro a·songo man·gipa moslarangoni niksengbatgipa MDH Masala brand-ni nokgipa ‘Mahashay’ Dharampal Gulati, bilsi 97 ga·dape da·al Bristibaro a·gilsakko watangaha.
Ramram manderangna on·gipa aro India-o gittamgipa dal·batsranggipa boksis, Padma Bhushan award-ko mija bilsio ra·chakanggipa Gulati, Delhi hospital-o donge baditaba antirangonin sana-bananiko ra·engmitingo, da·al Bristibar pringo ka·tong saaniko man·e siangaha.
Gulati, 1923 bilsio atchieming Pakistan, Sialkot-o donge dal·bagipa ong·achim. Uni pagipa Chuni Lal-ba, ua somaio uni chonbegipa dokan Mahashian Di Hat-o moslarangko palbaronggipa saksa ong·achim. Dokano pagipako dakchakna ua, an·tangni porianiko chonengmitingo watgalaha. Ua somaio, a·songko bakgni dakani ja·man Dharampal, nokdangni manderang baksa India-ona re·bae Sialkot-ni Mahashian Di Hatti “DEGGI MIRCH WALE” ni bimango moslarangko bikote palna gita a·bachengtaiaha.
A·songo man·gipa moslarangonide MDH-an dal·batsranggipa brand ong·a aro a·gilsak gimikoni gipin a·songrang jekai, Switzerland, Japan, US aro Canada a·songrangchiba uni moslarangko bang·en watatrongenga. India-ni ge 1000 bostu donramo aro lak 4 na bata pe·rarone palgipa dokanrango MDH moslarangko pilak biaprangchin palnangenga.
Unomiting, uni tanggitik sianganina skotong songjinma New Delhi-ni skotong minister Pa Arvind Kejriwal aro dakchakgipa skotong minister Pa Manish Sisodia-maang an·tangtangni Twitter-o uko dingtangmancha mande ra·e seatchengaha.
