Shillong, Aug 29: PM Poshan (Mid Day Meal) program-ni ning•o cook aro gipin kamrangko ka•enggipa manderangni dabianirangko a•dok sorkarini knachakjaengani gimin Jowai-o donggipa All Jaintia Mid Day Meal Workers Union (AJMDMWU), Sombar sal dipet Shillong-o asonge jingjengataniko dakna a•bachengataha.
Jingjengatenggipa manderang, Additional Secretariat building-ni parking lot-o tom•chimongtokahachim indiba ja•mano uamangko district administration, Shillong-o donggipa MBOSE office-ona apjitatskaaha.
Union-ni adviser KL Pariat-ni kobor ra•timgipa manderangna parakatani gitade, MDM-ni kamko ka•enggipa manderangna jaanti on•enggipa gong 1000-ni dormahako gong 5000-ona bariatchina dabiengachim aro 2019 bilsionin uamangna December aro January jani dormahakoba on•china dabiengachim.
Da•o dipet MDM-ni cook aro worker-rangna japrako on•enggipa gong 1000 honorarium-oni gong 900-ko ma•mong sorkarioniko aro gong 100-kode a•dok sorkarioniko man•engachim ine nikna man•a.
Indake ong•engon, MDM-ni cook aro helper-rangna a•dok sorkarini on•enggipa bakko gong 100-oniko gong 900-ona bariatchina aro honorarium-o December aro January jagnikoba man•chapatchina gita mol•mole changdokna kingking a•dokni chief minister-na sedoatahachim indiba da•alona kingkingan a•dokni chief minister, uamangko changsaba agangrikna okama dongkuja ine AJMDMWU-ni adviser parakataha.
Meghalaya a•doko da•alona kingking skul ge•saba MDM-ni cha•anirangko skulni bi•sarangna song•e on•na gita LPG-rangko man•kujaengani gimin LPG-rangko bree jakkalna gita tangka paisarangko on•china gitaba kam ka•giparang a•dok sorkario dabiengachim ineba Pariat parakataha.
