Tura, July 3: Sakgipin mandena palgimin a·ako me·chik saksana tol·e paltaiahani gimin Tura-ni police-rang, me·chik saksa aro me·asa saksako rim·aha.

Koborko on·ani gitade, sakgipin mandena palgimin a·ako ia mande sakgni, gong lak 10 hajal 50-na ia apsan a·akon ia me·chikna palahachim.

Iani bidingo police-rang, am·sandianirangkon dakon, sakgipin mandena palgimin a·ako ia me·chikna palna gita ia manderang, a·ani lekkarangko tol·e taritaiaha ine ma·sina man·aha.

Police-rangni u·iatani gitade, Tura-ni Bokmagre jolo saksa Brenny Bithon Basin Ch Marak minggipa mande, an·tangni a·ako palenga ine rim·ako man·gipa mande sakgni, ia me·chikna aganeaha aro ia me·chik a·ako brena gita gong lak 10 hajal 50-ko uamangna gamatahachim.

Indake ong·genchimoba, ja·mano ia a·ako sakgipin mandena palmanaha ine ia me·chik ma·sienba, an·tangni tangkarangko on·pilchina ia mande sakgniko aganon, uamang tangkarangko on·pilna ku·rachakmika dakaha indiba tangkarangko on·piljahachim.

An·tangni tangkarangko man·piljahani gimin ja·mano ia me·chik police-rangna badi ka·doeaha aro police-rang, Danakgre A-ni Noballina S Marak aro Upper Babupara-ni Brenny Bithon Basil Ch Marak minggipa mande sakgniko rim·na man·aha ine u·iataha.

Indake ong·engon, da·ororo internet gita manderangko cha·bokani aro mande palsrukanirang batroroengani gimin manderangna mikrakataniko on·na gita Sonibar salo, West Garo Hills a·jani police-rang, dingtangmancha awareness program-ko Tikrikilla jolo donggipa Bondukmali songo ong·atangaha.