Shillong, June 3: Meghalaya Energy Corporation Limited (MeECL)-ko chalaina gita gipin a•dokni company-rangna pakwate on•skana sorkarini manchienganiko Bristibar salo, Jaintia Hills-ni MLA-rang jegalataha.
Bristibar salo, Jaintia Hills-ni MLA-rang, chong•motan Lahkmen Rymbui, Coming One Ymbon, Sniawbhalang Dhar, Kyrmen Shylla, Wailadmiki Shylla aro Shitlang Pale-ko man•chape dingtang dingtang MLA-rang, Shillong-o tom•aniko ong•atangenba, sorkarini ja•ku de•na miksonganiko jegalangtokaha.
Tom•a matchotani ja•mano kobor ra•timgipa manderang baksa agangrikengon, MeECL-ko chalaina gita gipin a•dokni company ba sorkarina pakwate on•skana sorkarini manchienganiko Jaintia Hills a•jani MLA-rang raken jegalenga ine a•dokni Home Minister Lahkmen Rymbui parakataha.
“Chinga East aro West Jaintia Hills a•jani saksni MLA-rang sorkarini ja•ku de•na miksonganiko raken jegalenga aro MeECL-ko gipin a•dokni sorkari ba sorkari ong•gijagipa dolrangna pakwate on•jachina dabienga,” ine Rymbui parakataha.
MeECL-ni Aggregate Technical & Commercial (AT&C)-o noksan ong•aniko komiatchinasa MLA-rang nangnikenga indiba gipin dolrangna pakwate on•anikode raken jegalenga ineba Rymbui parakataha.
Jaintia Hills-o donggipa Myntdu Hydro Electric Project-ko chalaina gita gipin a•dokni dolrangna pakwate on•na manchianikoba MLA-rang raken jegalenga ineba Amlarem-ni UDP MLA Rymbui parakataha.
“Iani bidingo chinga Chief Minister Conrad K Sangma-ko gronge agangrikna miksongenga aro iako Jaintia Hills aro a•dok gimikni namgnina chanchiesa chinga saksni MLA-rang ja•ku de•enga,” ineba Rymbui parakataha.
Indake ong•engon, Jaintia Hills-o COVID-19-ko warachakanio nambate kamrangko ka•na man•na gita ta•raken RTPCR test centre-ko songe on•china MLA-rang, chief minister-o dabianggen ineba Home Minister parakataha.
Rymbui-ni aganani gitade, Shillong aro Tura-o gitan Jaintia Hills-oba corona care centre-ko kulina nangenga.
“Khliehriat CHC-o oxygen plant-ko ta•raken kulichina aro COVID-19-ni giproroaniko warachakanio Jaintia Hills-na kam ka•giparangko on•dapchinaba sorkariko didienga. Jaintia Hills-ni pilak PHC aro CHC-rangna chu•onga gita oxygen cylinder-rangko on•china gitaba chinga dabienga,” ine Rymbui parakataha.
