Shillong, June 6: Meghalaya Energy Corporation Limited (MeECL)-ni distribution franchisee (DF)-rangko Rural Electrification Corporation Power Distribution Company (RECPDCL)-na chalaina on•na skang kamrangko name nipilchengchina gita Meghalaya Assembly-ni Speaker aro United Democratic Party (UDP)-ni dilgipa Metbah Lyngdoh, Meghalaya sorkariko aganenba, Meghalaya Democratic Alliance (MDA) sorkarini kamrangko ka•anio maiba dakgualani donggenchimode uni dol, jrip nie dongjawa ine mikrakataniko on•angaha.
Lyngdoh-ni parakatani gitade, iani bidingo ua chief minister aro dingtang dingtang dolrangkoba gronge agangrikmanaha aro MeECL-ko chalaina gita RECPDCL-na pakwate on•na skangba sorkari, gipinrangni chanchianikoba nichengna nangchongmotenga.
Dingtang dingtang power company-rangna dongkuenggipa grorangko gamna gita REC-ara loan-ko on•enggipa agency ong•a ine janapatengon, bilsiantian sorkari iana gong kror 120-ko gamna nanggen aro bilsi gittamni ja•man gong kror 300-mangko gamna nanggen ine Assembly-ni Speaker parakataha.
“Uni gimin ia loan-ko ra•anian MeECL-ko tangatpiltaiani chol ong•enga ine anga an•tangde nikenga. MeECL-ko chalaina on•genchimode iano kam ka•soenggiparangna jajrengna nangani ong•gen aro MeECL-o neng•nikanirangkosa man•dapgen, uni gimin iako dakna skang name nipiltaichina anga nangnikenga,” ine Lyngdoh parakataha.
MeECL-na on•gipa gong kror 1,345-na batgipa loan-ko gamgenma ma MeECL-ni mitam distribution circle-rangko chalaina gita REC PDCL-na on•gen, iako a•dok sorkari, mikkang antio chanchina siengachim.
