Shillong, April 1: Bijolina akkal-karap ong·engmiting somoio bijoliko watenggipa PowerGrid-na gro nanggipako Meghalaya Energy Corporation Limited (MeECL)ni matchote gamkujani gimin re·baenggipa April jani 14 tarikoni a·bachenge a·doko bijoli wataniko somoi gita kimittaie watna power grid-ni tik ka·enganichi a·dok sorkarina sko saani ong·tainasienga ine nikatna man·enga.
Koborni manderang baksa agangrikao iani gimin u·iatengon, MeECL, bijoli watani bidingo power grid-oniko chittiko man·soaha, indiba a·dok sorkari uamangna gamna nanggiparangko man·adipet matchote gamna gita jotton ka·enga ine dakchakgipa skotong minister Pa Prestone Tynsong, Bristibar salo aganaha.
MeECL-ko sorkarichi ong·gija private-chi chalaiangna miksonganirang gnang ine dingtang dingtang dolrangni sorkariko mikrakatanina aganchakengon, iani gimin ua an·tangde mamingkoba knaa dongkuja ine Pa Tynsong aganaha.
Bijolirangko watenggipa aro bijoli bikotgiparang jekai North Eastern Electric Power Corporation Limited (NEEPCO), National Thermal Power Corporation (NTPC), PowerGrid aro gipinrangna a·dokni MeECL tangka-paisao namen neng·nikanirangko chagrongenga baksana gong kror 1000 mangko gamdatna nange bang·en grorang dongengachim ine nikatna man·gen.
Indita gro oniko MeECL-ko naljokatna gita ma·mong sorkarini Atmanirbhar scheme-ni ning·o gong kror 1345 mang tangkarangko ra·srona cholrangko on·enggipaosa a·dok sorkari pangchake dongskaengachim ineba janapjolna gita man·gen.
Minggipin, mija Butbar salo South West Khasi Hills, Mawkrywat-o rally-ko ong·atango mitam NGO-rangni adita salna skang Shillong-ni Golf links-o ong·anggipa obostao Khasi chadambeko so·otaniko matnangatenba, niamchi bichal ka·e on·na man·jaode chinga jattangni gita kragipa bichalko ka·e on·angskagen ine agananganina, niamo pangchake pilak kamkon ka·enga aro saoba manigija niamko pe·a ong·ode uamangni kosako sastiko on·skagen ine Pa Tynsong mikrakataha.
Janapjolna gita, South West Khasi Hills a·jani Wahkaji songoni sakgittam Khasi chadamberangko ma·sina man·gijagipa adita sak gipin jatrang mija March 21 tariko Shillong, Golf Links-o bilongbee doka-sataha jeni a·selo uamangoni saksade mija Robibar salo NEIGRIHMS hospitalo janggi galaha.
Hynniewtrep A·chik National Movement (HANM), CEC-ni chang 12-gipa anniversary-ko adita salna skang Ri-Bhoi district-o maniango bakko ra·e tom·bagiparangna aganprakao, skang 1979 bilsi jolo gipin jatni manderangko an·tangba dokrongachim ine dakchakgipa skotong minister Pa Prestone Tynsong-ni agananiko warachakgipa Congress dolni dilgipa Pa Ampareen Lyngdoh-ni jegalangskaani gimin ian dingtang dingtang NGO-rangni dilgiparangna mikkangchi a·dokona re·bagipa gipin jatrangko doke-sate rojachina gita an·tangni cha·tote nikbagiminko uamangna u·iate on·achi maiba skidapanirangko on·na miksongesa ia kattarangko aganahachim ine dakchakgipa skotong minister talataha.
Mikkangchi sokbagnigipa chasongna namgniko on·na gita batanggimin somoio an·tangtangni cha·totbagiminko man·siate on·anira namen gamchata aro ian songsalnaba dakchakani ong·gen ine ua aganangkuaha.
Minggipin, ia jani gisepon ong·nasienggipa GHADC-na pu·onatani gimin Garo Hills-oniko koborko man·soengani gitade ua eleksino NPP dolan bang·bata vote-rangko chegen aro council-o EC-ko rikna man·gen ine ka·dongsoenganiko National People’s Party, Brisitibar salo parakangaha.
Iani bidingo kobor segimgiparangna aganananio, NPP dolni a·gipi dilgipa aro Meghalaya-ni dakchakgipa skotong minister Pa Prestone Tynsong, Bristibar salo indine aganaha je, mikkang antiode ua an·tangba adita sak a·gipi dilgiparang aro dolgipinni dilgiparang baksa Garo Hills-chi wenanio skotong minister baksa bakrimna miksongenga.
GHADC-ko chalaianio kam tik ong·gijanirang donganiko nirokatna gita special audit team-ko donataha ineba Pa Tynsong u·iataha.
GHADC eleksino gipin jatrang susana aro vote pu·onna man·aiani bidingo songsalni bang·a manderang iako ra·chakna man·gija jegalanirangko dakenggipani gimin agananio, sixth schedule-ko namdapatani kamrangkoba ka·anggen ine u·iatange, jensomoio iako parlliament-o ra·chakatahaon a·dokni pilak district council-rangan namdapatgimin gital niamrangko ja·riktokna nanggnok ine Pa Tynsong agandapangaha.
